Mini Füessli vor de Behandlig

1. Behandlig (7.10.05)
Am erschtä Friitig vo mim Lebä sind mer scho id Schulthess Klinik zum Dr. Velasco gangä. Er hätt mini Füessli gnau agluegt und minä Eltere erklärt wie er das tuet behandle. Denn hätt er mini Hüft agluegt mit em Ultraschallgrät. Mini Hüft sind nuch nüd guet usgriift gsi aber das sig normal i dem Alter… Tja und denn hätt für mich erscht richtig agfange, bis jetzt isch ja alls nuch recht schön gsi.
Mir händ den de Rum gwechslet und sind is Gipszimmer gangä, vorher han ich nuch öppis s trinke übercho bim Mami. Im Gipszimmer hätt der Dr. Velasco mini ganze Bei igipst, tja dur es paar Misgschick vorallem wege de Gipserin händs der erschti nuch emal müsse wegneh und zwar mit em Messer und händ min Fuess verletzt das hätt mega weh tue und ich han fescht müessä brüelä. Wo denn das alls verbi gsi isch han ich mit em Mami und em Papi wieder hei go chännä. De ganz Abig han ich müessä brüelä und han mini Elterä fascht zur Verzwiflig bracht, es isch doch so uagnehm mit dene schwere Bei! Ich han mi denn aber schnell dra gwöhnt…

Das sind mini erschtä Gipsli

2.  – 4. Behandlig
Da han ich jedes Mal nüi Gipsli übercho. Das ganzi isch besser abglofe, ich han immer anderi Gipser cha. De Dr. Velasco isch immer sehr zfriede gsi wie schnell das bi mir vorwärts gaht. S Mami und de Papi händ au Freud gha das es bald fertig isch mit denä Gipsli

4. Gipsli vor der Achillessehne Durchtrennig

5. Behandlig (4.11.05)
Da bin ich scho en Monät alt gsi und scho mini erscht chlini Operation. Nei so schlimm isch es nüd gsi. De Dr. Velasco hätt mini Achillessehne müessä durchtrenne damit sie länger wird und ich de Fuess guet chan abrolle bim laufä. Ich wett ja mal richtig laufä chännä!
Also ich han z erscht s trinkä übercho vum Mami und denn han ich bim Dokter es Zäpfli mit Schlafmittel übercho, derzue nuch Pflaschter wo tüend örtlich betäubä ad Achillessehne. Denn han ich ide Warteziit nuch dörfe a de Bruscht trinkä. Denn bin ich so richtig müed worde und Behandlig hätt agfangä. De Dr. Velasco hätt also mini Achillessehne durchtrennt und es Pflaschter druftue es hätt doch recht bluetet am Afang. Mini Eltere händ mich ghebt und tröschtet wil es paar Tränli han ich doch müessä vergüssä während em Schnitt. Das hätt trotz Betäubig chli wehtue! Nachher han ich wieder Gipsli übercho für zwei Wuchä.

6. Behandlig (18.11.05)
Da han ich nur wieder nüi Gipsli übercho. De Dokter isch mega zfriede gsi mit de Füessli will d Achillessehne isch scho wieder zämä gwachse gsi. Das isch so öppis wo eus niemmert glaub das das wieder zämäwachst eifach so.

7. Behandlig (25.11.05)
Da bin ich mini erschtä Gipsli ändlich los worde. Na ja derfür hätts den es Fuessgstell geh, das isch au nüd so toll aber das chan ich wenigschtens all Tag ei Stund abzieh und bädele dörf ich jetzt au wieder. Isch das der Plausch…
Während am Apasse han ich immer brüelet will das isch überhaupt nüd luschtig gsi a minä Füessli umehandiere. Derfür han ich nachher uf em Heiweg nur gschlafe.

Das isch grad nachem erschtä Mal bade, am erschtä Tag mit dem Gstell!

8. Behandlig (4.01.06)
De Dokter hätt welä luege wie mini Füessli usgsehnt und wie sich das ganzi Entwicklet hätt. Er isch zfriede mit em Resultat. Derzue hätt er wieder mal mini Hüeftli agluegt und en Ultraschall gmacht. Ich han ihn aglächlet und er hätt s mega schön gfunde. So machts Spass zum Dokter go.

9. Behandlig (28.02.06)
Ändlich isch es sowiit ich muess das Gstell nur noch ide Nacht alegä. Yeh!! Also ich freu mich mega ufs Strample de ganz Tag und d Füess id Luft hebä ohni so vill Gwicht dra!
Aso de Dokter isch zfriede mit de Füessli. Ich muess jetzt lang nümä go. Erscht i drü Monät wieder! Yeh!!

10. Behandlig (31.05.06)
De Dokter isch sehr zfriede mit mine Füssli, er seit das alls guet chunnt und mer wahrschiinli gar nüd me gseh wird! Mir händ uh Freud!! Jetzt chum ich nüi Schüehli über da mini Fuess jetzt doch recht gwachse sind! Nur bis die chänd gahts nuch es paar Wuche. Die Schüehli werdet in Amerika gmacht und über England chänds zu üs id Schwiiz. So gaht das halt chli länger! Derür sinds Massgschnideret. Für de Moment han ich Ersatzschüehli die sind aber nie so guet wie die andere! I drü Monät muess ich den wieder zum Dokter!

11. Behandlig (05.09.06)
De Dokter isch immer nuch sehr zfriede mit mine Füssli… Er meint meh gseht gar nüd me das ich emal Klumpfüssli gha han!
Er hätt glueget wie ich uf mine Füssli stah, au das isch guet. Ich stah ja au sehr gern uf!
Jetzt muess ich erscht i vier Mönät wieder go!

12. Behandlig (10.01.07)
De Dokter isch sehr zfriede mit mine Füessli. Er hätt ganz gnau welle luege wie ich chan laufe. folgende Behandlungen bis Oktober 2009

De Dokter isch immer zfriede gsi mit mine Füessli und ich han s Gstell au all Nacht a! So muess ich das noch alege bis zum mim vierte Geburtstag.
A mine Füessli gseht mer nüd meh das ich Klumpffüssli gha han. Mer machet bald mal es Föteli vo mine Füessli.
ab November 2011

Im Oktober 2011 hätt em Dr. Velasco beweglichkeit und dehnbarkeit vo de Achillessehne nöd gfalle. So sind mir ab em November all Wuchä id Physio währed 2 Monät. Bi de nächschte Kontrolle, hätt me e Verbesserig gseh, aber zwenig. So sind mir wiederhii id Physio aber nur noch all 2 Wuchä.

Im Mai 2012

Mir händ wieder en Termin bim Dr. Velasco gha. Er gseht e starki Verbesserig isch aber immer nonig ganz zfriede. Mir händ uf Rat vo de Physiotherapeutin gseit mir wellät wiederhin id Physio all 2 Wuchä. So gönd mir jetzt wieder bis im September wo mir de nächscht Termin bim Dr. Velasco händ.
November 2013

Flavia hat monatlich einen Termin bei der Physiotherapie. Dr. Velasco ist sehr zufrieden. Das einzige was wir gut beobachten müssen, ist die Dehnbarkeit der Achillessehne. Flavia hat sehr schöne Füsse. Sie sind eher klein. Sie hat mit 8 Jahren eine Schuhgrösse von 29. Ihre Geschwister haben sie alle überholt.